|
ANTZERKI FERIA
DONOSTIA
Baztertu ezineko hitzordua!
|
Donostiako
Nazioarteko Feria baztertu ezineko hitzordua da arte eszenikoentzat.
Uda hasieran izaten da, eta udako kulturraldiari eman ohi dio hasiera
Donostian.
1988an
izan zen lehenengoa, eta orain arteko hamaika edizioetan erreferente
argia bihurtu da Espainia osoko arte eszenikoetako profesionalentzat,
eta harremanak estutzen jarraitzen du Latinoamerika eta Europako merkatuekin.
Antzerkiaren topaleku gisa ondo sendotutako kultur gertaera izaki,
urteak daramatza Estatu osoko ferien buruan. Donostiako Feriak, areto
programazioari eta etorri ohi diren programatzaileen ugariari esker,
nabarmentzea lortu du. Programazioan eta produkzioan duen kalitatea
da Antzerki Feria honen ezaugarri nabarmengarrietako bat.
Feriak
arte eszenikoen merkatua bizkortzen laguntzea du xede nagusi, eragileak
harremanetan jarriz eta azken antzerki sorkariak aurkeztuz, arreta
berezia eskainiz Euskal Herriko konpainiak bultzatzeari. Bestalde,
Feriak badu festa izaera ere. Arte eszenikoen festa handia, Donostian
udan izan ohi diren zine eta musika jaialdi nabarmenenak osatzera
datorrena.
Donostiako
Feria, hartara, arte eszenikoen sektorearen topaleku nagusi bihurtzen
da lau egunetan, eragileen arteko hartu emanak sustatuz eta sektorearen
beraren garapena erraztuz. |
Donostiako
Feriaren zenbait datu
• Antzerki
Feriaren lau egunetan zehar, Donostia arte eszenikoen
merkatu handi bihurtzen da. Feria sektoreko eragileen
sekulako topalekua da, trukerako eta kontrataziorako aukera ugari
eskaintzen baititu. Donostiako Feriak negozio kopuru handia sorrarazten
du, zuzenean nahiz zeharka, partaideen artean. Hori dela eta, konpainia
askorentzat, 300 hautagai baino gehiago 2004an, Donostia aukera ezin
hobea da merkatu berrietara hedatzeko.
• Donostiak, Antzerki Feriari esker, arte
eszenikoen 600 profesional baino gehiago hartzen ditu. Horietarik,
programatzaileak dira 200. Nabarmentzekoa da Estatuko
antzoki nagusietako ia programatzaile guztiak etortzea, bai eta
nazioartekoak ere, hala europar nola latinoamerikarrak.
• Feriaren programazioa askotarikoa
da, kalitatezkoa, eta berriki estreinaturiko ikuskizunak aurkeztea
du lehentasun. Donostiaren bereizgarria da aretoko antzerki eta
dantza programazio zaindua aurkeztea. Programazio hori kaleko programazioarekin
osatzen da, Antzerki Jaialdi bat ia, hiriaren erdian kontzentratua,
Donostia osoa girotzen duena. Feriaren azken edizioan 31 ikuskizun
programatu ziren guztira, eta 60 emanaldi baino gehiago egin ziren.
• Donostiako Feriak kalitatearen aldeko apostu irmoa
egitea du bere bereizgarri nagusietako bat. Kalitatea proposamen
artistikoetan, antzokietan, bai eta akreditaturiko profesionalen
egonaldian ere. Tamaina honetako gertaera baten kalitatearen aldeko
apostu horren bermagarri ditugu hiri turistiko honetako hotel azpiegitura
ona eta bertako antzokiak.
• Donostiako ikusleek masiboki erantzuten
diete Feriaren proposamenei. Antzerki Feriaren lau egunetan zehar,
20.000 ikusle inguruk gozatu ohi dute programaturiko
obrez, hala aretoan nola kalean. Ikusleriaren eskaera handia dela
eta, funtzio askotan jarri ohi da “Sarrera guztiak salduta”
txartela.
|
|